Энэ зун европийг орхиж Японы багт тоглохоор болсон Андрэс Иньэста болон Фэрнандо Торрэс нар тус тусын багтаа анхны тоглолтоо хийлээ. Андрэс Иньэста Виссэл Кобэ багийнхаа төлөө сүүлийн 32 минутанд тоглосон бөгөөд баг нь тус тоглолтонд 3:0 харьцаатайгаар ялагдал хүлээжээ. Торрэсын хувьд ч ялагдал хүлээсэн бөгөөд тэрбээр Саган Тосу нь 1:0-ээр хожигдсон тус тоглолтонд сэлгээгээр орж ирсэн байна.
Андрэс Иньэстагийн тоглолтыг үзэхээр нийт 26 мянган үзэгч цугласан байна. Тэрбээр Испанийн Барсэлона багт зүтгэхдээ 32 цом хүртэж, дэлхийн шилдэг хөлбөмбөгчинд нэр дэвшиж, аваргуудын лигийн цомыг 4 удаа өргөсөн билээ. Энэ жил 34 настай тэрбээр энэ зун мөн Испанийн шигшээ багийнхаа хамтаар дэлхийн аваргад оролцсон ч шөвгийн 16-аас тэмцээнээ өндөрлүүлсэн юм.
Фэрнандо Торрэсийн хувьд Испанийн Атлэтико Мадрид багт нийт 404 тоглолтыг хийхдээ 129 гоолыг оруулсан амжилттайгаар багаа орхисон билээ. Багаасаа Атлэтико Мадридад тоглосон Торрэс карьераа өсөх үед багаа орхиж Ливерпүүл, Челси багуудад тоглоод амжсан юм. Түүний хувьд энэ зун Испанийн шигшээ баг дэлхийн аваргад оролцоход бүрэлдэхүүнд нь багтаж чадаагүй билээ. Торрэсийн Саган Тосу баг Вегалта Сандэй багт 1:0-ээр хожигдсон бөгөөд тэд 87 дахь минутанд гоол алдсан.
Иньэстагийн хувьд анх удаагаа Барселонагаас өөр багт тоглосон нь энэ бөгөөд Барсад нийт 674 тоглолтыг хийсний эцэст Японы Виссэл Кобэ багийн өмсгөлтэйгээр талбайд гарсан нь энэ билээ. Мөн тэрбээр дэлхийн аваргаа ОХУ-д хожигдож өндөрлүүлсний дараачаар шигшээ багаасаа албан ёсоор зодог тайлж буйгаа зарласан. Түүний хувьд Испанийн шигшээ багийн төлөө нийт 131 тоглолтыг хийжээ.
‘Хожигдсон нь үнэхээр харамсалтай байлаа. Учир нь би ялагдал хүлээх дургүй. Гэхдээ энэ бол гайхалтай адал явдлын дөнгөж эхний алхам.’ хэмээн 34 настай Испани тоглогч Андрэс Иньэста тоглолтын дараа ярьжээ.
Иньэстагийн Виссэл Кобэ дараагийн тоглолтоо 7 сарын 28-ны өдөр Кашива Рэйсол багийн эсрэг хийнэ. Тус тоглолтонд тэрбээр гараанд гарах магадлалын хувьд маш өндөр. Кашива Рэйсол лигийн 15-д бичигдэж буй тул түүний хувьд Япон дахь анхны хожлоо тус тоглолтонд байгуулах боломжтой.
