Аваргуудын лигийн шөвгийн наймын сугалаа явагдлаа. Шөвгийн 16 шатанд өрсөлдөгчдөө буулгаж авч цааш шалгарсан Испанийн Реал Мадрид, Барселона, Севилья, Английн Манчестэр Сити, Ливерпүүл, Германы Баерн Мюнхэн, Италийн Рома, Ювентүс клубууд сугалаанд оролцсон юм.
Испанийн Барселона клуб Италийн Роматай учраа таарлаа. Тэд 2015 онд нэг Аваргуудын лигийн хэсгийн шатанд таарч байсан. Тэдний сүүлийн уулзалтад Барселона Камп Ноудаа 6:1 -ийн харьцаатай буулган авч байсан билээ. Нийт тэд хоорондоо 5 тоглож Барса 2 ялж, 2 тэнцэж Рома 1 удаа ялж байжээ.
Сугалаагаар энэ удаагийн Аваргуудын лигт нэг улсаас хамгийн олон баг буюу 5 баг ороод байсан Английн клубууд шөвгийн 16 -аас цааш Манчестэр Сити, Ливерпүүл клубууд шалгараад байсан ч шөвгийн наймын шатанд хоорондоо таарлаа.
Шөвгийн наймын шатанд хамгийн гал гарсан тоглолтоор Хуучны Ноёд болон Эзэн хааны багуудын тоглолт нэрлэгдэж байна. Ювентүс клуб өмнөх улирлын шигшээ тоглолтод ялагдсан хариугаа авах тоглолт байх болно.
Английн Манчестэр Юнайтэд клубыг гэрт нь 2-1 -ийн харьцаатай ялж цааш шалгарсан Севилья клуб Германы Баерн Мюнхэнтэй оноолт таарсан. Тэд өмнөх шатны тоглолт “аз” биш байсан гэдгийг батлах тоглолт байх болно.
